تاريخنا حياتنا

معبد الملكه حتشبسوت

المستشار فاروق شرف

رغم إن مصر مليانة معابد مهمة ، لكن معبد حتشبسوت من المعابد المميزة جدا فى العالم، مش بس فى مصر. و ده بسبب تصميمه الفريد و المختلف تماما عن باقى معابد مصر القديمة.

المعبد عبارة عن وثيقة تاريخية، أو كتاب مفتوح بيحكى تاريخ مصر فى عهد إمرأة من أقوى و أجمل نساء الأرض😍، أول ملكة فى التاريخ، حتشبسوت اللى أمرت ببناء المعبد فى الضفة الغربية لنهر النيل المقابلة لطيبة (الأقصر).

حتشبسوت بتنتمى للأسرة الثامنة عشر فى عصر الدولة الحديثة.عاشت فى الفترة ما بين 1504 – 1457 ق.م. وصلت لحكم مصر بصفتها الوريثة الشرعية للعرش لأنها أكبر أخواتها البنات، و أبوها الملك (تحُتمس الأول) مكنش عنده أولاد ذكور.
و لأن معظم الكهنة كانوا رافضين فكرة إن الملك يكون إمراة و فى إيديها كل السلطات، فعشان كده إتخلت حتشبسوت عن جمالها و أنوثتها عشان تثبت للجميع إنها جديرة بالحكم، و إنها تقدر تحقق نهضة عظيمة ميقدرش يحققها الملوك الرجال 😍😍. و ده فعلا اللى عملته حتشبسوت، خلعت ملابسها النسائية و ارتدت ملابس و تيجان الملوك، و فى معظم التماثيل كانت بتظهر حتشبسوت بالدقن المستعارة الخاصة بالملوك الرجال.

رغم إن مصر كانت بتمر بفترة من أصعب فتراتها و كانت خارجة من عصر إضمحلال و أحتلال إستمر لأكثر من 100 سنة، لكن حتشبسوت قدرت تفرض سيطرتها على الحكم. إهتمت بتقوية الجيش و صناعة السفن و البناء، فتحت المحاجر و المناجم اللى كانت مهملة لفترة طويلة، لدرجة إن موجود فى سيناء دلوقتى لوحة أثرية تذكارية عبارة عن رسالة من عمال مناجم النحاس بيشكروا فيها الملكة على اهتمامها بفتح المناجم اللى فضلت مقفولة من بداية احتلال الهكسوس.😀😀❤️🌹

قدرت بذكاءها و دبلوماسيتها إنها تبنى علاقات ممتازة مع كل الدول عشان تقطع الطريق أمام أى حرب أو تهديد خارجى. نظمت رحلات بحرية للتجارة مع شعوب المحيط الأطلسى و شعوب البحر الأحمر و دول الشرق القديم، و عشان كده كان عصر حتشبسوت متميز بالسلام و الرفاهية. و طبعا حتشبسوت كانت حريصة على تسجيل و توثيق كل تفاصيل رحلتها التجارية الشهيرة إلى بلاد بونت أو (بنط) – الصومال و جنوب اليمن حاليا- على جدران معبدها فى البر الغربى.📷
حتشبسوت حكمت مصر لمدة 22 سنة، و توفيت و هى عمرها 48 سنة نتيجة إصابتها بالسرطان 😥. و تم دفنها فى مقبرتها فى وادى الملوك (المقبرة المشهورة عالمياً بأسم KV20) و اللى معظم علماء الأثار بيعتقدوا إنها أول مقبرة تم تشييدها فى وادى الملوك، و انها كانت مخصصة فى الأصل لدفن أبوها (الملك تحُتمس الأول)، و ده اللى بيفسر وجود مقبرة حتشبسوت فى وادى الملوك (مش فى وادى الملكات).

معبد حتشبسوت اللى عمره أكثر من 3500 سنة، بناه مهندس اسمه (سنموت) اللى بعض المؤرخين بيعتقدوا إن كان في علاقة حب بينه و بين الملكة، لكن الأعتقاد الأرجح هو إن حتشبسوت كانت بتحترمه، و كان له مكانة كبيرة عندها بسبب انبهارها وحبها بفنه و أعماله الهندسية، و إن علاقتها به كانت علاقة إحترام و تقدير مش علاقة عاطفية. ********************** نقل وإعداد للإستفادة وحق المعرفة.

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock